வரவேற்பு சொல்லும்
அழகழகாய் வானத்தில் முகில்வரையும் கோலம்
****அழித்தழித்து மீண்டுமது வடிவாகும் ஜாலம் !
கிழக்கிலெழும் பரிதியொளி பட்டருவி மின்னும்
****கிள்ளையொடு குயில்பாட்டும் எழிலூட்டும் இன்னும் !
வழிநெடுக குரங்கமர்ந்து வரவேற்பு சொல்லும்
****வளைந்தமலைப் பாதையோர மரக்கிளையில் தொங்கும் !
வழுக்கிவிடும் பாறைகளில் மந்திவிளை யாடும்
****வயிற்றிலதன் குட்டியுடன் அங்குமிங்கு மோடும் !!
தின்பண்டம் வைத்திருந்தால் அபகரித்துப் போகும்
****திரும்பியதை நோக்கிடிலோ முகமுழுதும் வேகும் !
தன்னிணையை முன்னமர்த்திப் பேனெடுத்துத் தின்னும்
****தாவியது கிளைகளிலே சாகசத்தைக் காட்டும் !
முன்னோரைக் கண்டமனம் குதூகலித்தே ஆடும்
****முத்தமிழுள் முதற்றமிழில் கவியெழுதிப் பாடும் !
புன்னகைத்து நட்புடனே படம்பிடித்துக் கொள்ளப்
****பூரிப்பில் மந்தியது பல்லிளிப்ப தழகே !!
சியாமளா ராஜசேகர்
