தூற்றப்பட்டார் அல்லால் எஞ்சினார் இவ்வுலகத்து இல் - நாலடியார் 21

நேரிசை வெண்பா

மலைமிசைத் தோன்றும் மதியம்போல் யானைத்
தலைமிசைக் கொண்ட குடையர் - நிலமிசைத்
துஞ்சினார் என்றெடுத்துத் தூற்றப்பட் டாரல்லால்
எஞ்சினார் இவ்வுலகத் தில். 21

யாக்கை நிலையாமை, நாலடியார்

பொருளுரை:

மலையின் உச்சியில் தோன்றுகின்ற முழு நிலாவைப்போல யானையினது தலையின் மேல் கொள்ளப்பட்ட குடைநிழலிற் சென்ற அரசரும் இந் நிலத்தில் இறந்து மண்ணானார் என்று குறித்து இழித்து உரைக்கப்பட்டாரே அல்லாமல் இறவாமல் நின்றவர் இவ்வுலகத்தில் இல்லை.

கருத்து:

மக்களாய்ப் பிறந்தவர் எத்தகையோர் ஆயினும் அவர் இறந்து போதல் உறுதியாதலின், இருக்கும் போதே யாவரும் அறஞ் செய்து கொள்க.

விளக்கம்:

‘யானைத் தலை' என்றதற்கேற்ப உவமையிலும் ‘மலையின் உச்சி' யென்று உரைத்துக் கொள்க.

குடையர் - குடையையுடையராய் அதன் நிழலில் இருக்கும் அரசர்.

இறுதியில் ‘இவ்வுலகத்து' என வருதலின் ‘நிலமிசை' யென்றது.

மண்ணில் என்னும் பொருட்டு, மண்ணில் வீழ்ந்து மண்ணோடு மண்ணானார் என்பது குறிப்பு.

எத்துணை உயரத்தில் ஏறிச் சென்றோர்க்கும் முடிவில் இருப்பிடம் மண்ணே எனவும் ஒரு நயம் காண்க.

எனவே ஏனையோர் இறத்தல் பற்றிக் கூற வேண்டாதாயிற்று. இறந்தார் என்னுஞ் சொல் இழிவு தருதலின், தூற்றப்பட்டார் எனப்பட்டது.