விடிந்தால் பண்டிகை, பொள்ளாச்சி அபி
விடிந்தால் பண்டிகை.,
வீடு சுத்தமாய் இருக்க
வேண்டுமல்லவா..!
என் மனைவி
சமையலறை முதல்
சுற்றுச்சுவர் வரை
ஒட்டடையடித்து-புதிய
வண்ணம் தீட்டிக் கொண்டிருந்தாள்.
சிறிய மகள்
இருக்கை,படுக்கைகளை
சுத்தம்
செய்து கொண்டிருந்தாள்.
பெரிய மகள்
வீடு பெருக்கித் துடைத்து
வழித்துக்
கோலமிட்டுக் கொண்டிருந்தாள்.
நான்..,
"பெண்ணுக்கும் சமஉரிமை"
வேண்டுமென வலியுறுத்தி
க..வி..தை எழுதிக் கொண்டிருந்தேன்..!
வீடு சுத்தமாச்சு.,
கவிதை அழுக்காச்சு..!
