கடைவிழி சொல்லாமல் சொல்வது காதல்மொழி
பாவினம் :
மடலவிழ் பொழிலெழில் தாமரை மலர்முகம்
கடல்விரி எழில்நீல கயலசையும் கருவிழி
உடலொரு மலரசை மென்மலர் பூங்கொடி
கடைவிழி சொல்லாமல் சொல்வது காதல்மொழி
-----ஒரே எதுகை நாற்சீர் நாலடி ---இது கலிவிருத்தம்
பா :
மடலவிழ் நற்பொழில் தாமரைப் பூவே
கடல்விரி நீலம் எழில்மீன் விழிகள்
உடலொரு பூங்கொடி ஆடும் அழகில்
கடைவிழிசொல் லும்மொழிகா தல் !
-----ஒரு விகற்ப இன்னிசை வெண்பா
மடலவிழ் நற்பொழில் தாமரைப் பூவே
கடல்விரி நீலம் விழிமீன் - உடலோர்
படரெழில் பூங்கொடி ஆடும் அழகில்
கடைவிழிசொல் லும்மொழிகா தல் !
----ஒரு விகற்ப நேரிசை வெண்பா
கவிக்குறிப்பு :
யாப்பார்வலர்கள் கூர்ந்து கவனித்தால் மாற்றம் வெண்பா விதிகளுக்கு
ஏற்ப எப்படி அமைக்கப் பட்டிருக்கிறது என்பது புரிய வரும்
