துளங்கினுந் தன்குடிமை குன்றாத் தகைமை – திரிகடுகம் 41
இன்னிசை வெண்பா
அலந்தார்க்கொன் றீந்த புகழும் துளங்கினுந்
தன்குடிமை குன்றாத் தகைமையும் - அன்போடி
நாள்நாளு நட்டார்ப் பெருக்கலும் இம்மூன்றுங்
கேள்வியு ளெல்லாந் தலை 41
- திரிகடுகம்
பொருளுரை:
வறுமையால் துன்பப்பட்டு வந்தவர்கட்கு அவர் விரும்பும் ஒரு பொருளை ஈந்ததனாலாகிய இசையும்,
வறுமை முதலியவற்றால் தளர்ந்த காலத்தும் தன் குடிப்பிறப்புக்குத் தகுந்த ஒழுக்கம் குறையாத இயல்பும்;
அன்பு மிகுந்து நாடோறும் நட்புச்செய்தவரை பெருகச் செய்தலும்
ஆகிய இம்மூன்றும் கேட்கப்படும் அறங்கள் பலவற்றிலும் முதன்மையானவையாகும்.
கருத்துரை:
வறுமையால் வருந்துவோர்க்கு ஈதலும், வறுமையுற்ற விடத்தும் தன் குடிப்பிறப்புக்குத் தாழ்வனவற்றைச் செய்யாமையும். நட்புச்செய்தவரை மேன்மேலும் பெருக்குவதும் சிறந்த அறம்.
ஈந்த புகழ் - ஈந்ததனாலாய புகழ்:
இன்னாத்தகைமை - இன்னாமைக்கு ஏதுவாகிய தகைமை: கேள்வி - கேட்டலா லுண்டாகிய அறிவு:
